بنتي كانت كل يوم العصر تاخد كيس أسود وتطلع على السطوح بحجة إنها بتأكل قطط الشارع… كنت فاكرة إن قلبها حنين وبتحب الحيوانات، لحد ما لاحظت إنها بتنزل مجهدة، وهدومها متلبسة بتراب السطوح العادي… ولما قررت أطلع وراها وأفتح الأوضة المقفولة اللي بتدخلها، اللي شوفته خلاني أتخض وأكلم جوزي “جلال” اللي سايب البيت ومقاطعنا من شهور عشان يلحقني!!!!
من يوم ما المشاكل زادت بيني وبين “جلال” جوزي، وقرر يسيب البيت ونعيش شبه منفصلين، وأنا قافلة على نفسي وكل دنيتي بقت بنتي “حبيبة”. حبيبة دلوقتي في تالتة ثانوي، ضغط ومذاكرة وتوتر، وعلشان كده كنت بحاول أوفر لها أهدى جو ممكن. طول عمرنا أصحاب وبنحكي لبعض كل حاجة، بس في الشهر الأخير، حبيبة اتغيرت 180 درجة، وحسيت إن في سر مخبياه عني.
الحكاية بدأت لما لاحظت إنها كل يوم الساعة 4 العصر بالدقيقة، تسيب المذاكرة، تلم بواقي أكل في كيس أسود بلاستيك، وتقولي: “أنا طالعة أأكل القطط اللي على السطوح يا ماما وأشم هوا عشر دقايق”. في الأول قولت عادي، بتفصل من المذاكرة وبتعمل خير. بس الموضوع كبر.. العشر دقايق بقوا ساعة وساعتين!
ولما تنزل، ألاقيها مجهدة وشكلها تعبان، وهدومها فيها آثار تراب الغرفة القديمة، وساكتة وطاقتها منتهية.
لما سألتها: “يا حبيبة، إنتي بتعملي إيه فوق كل ده؟”
ردت بتوتر وعينيها بتهرب مني: “مفيش يا ماما، السطوح بس مترب والقطط بتلعب حواليا.. وبعدين أنا بفك عن نفسي شوية، إنتي عارفة ضغط ثانوية عامة.”
كلامها ما دخلش دماغي أبداً. القطط مبتاكلش كل يوم ساعتين! الشك بدأ ينهش في عقلي، أفكار سيطرت عليا.. هل بتكلم حد فوق؟ هل في حاجة غريبة بتعملها لوحدها؟ كان لازم أقطع الشك باليقين.
امبارح العصر، عملت نفسي نايمة وتعبانة جداً. أول ما سمعت باب الشقة بيتفتح بالراحة، قمت جري على طراطيف صوابعي وطلعت وراها. لقيتها رايحة ناحية “أوضة الكراكيب” القديمة اللي على السطوح… الأوضة دي مقفولة بقفل مصدي من سنين! لقيتها بتطلع مفتاح من جيبها، فتحت ودخلت وقفلت وراها من جوه.
استنيت خمس دقايق، وبعدين قربت من الباب وبصيت من شق صغير في الخشب… واللي شوفته جوه خلاني أستغرب جداً!!
من القلق رجليا شالتني بالعافية ونزلت شقتي. جسمي كله كان مشطوت. من غير ما أفكر مسكت تليفوني ورنيت على “جلال”… الرقم اللي مكنتش ناوية أطلبه تاني أبداً.
رد عليا ببرود: “أيوة… خير في إيه؟”
قلت بصوت متهدج من القلق: “إلحقني يا جلال… بنتك حبيبة في حاجة غريبة بتحصل معاها… اللي شوفته فوق السطوح مش طبيعي، تعالالي حالا!!!!”
#الكاتبه_نور_محمد
سكت جلال لثواني على الناحية التانية من الخط… السكوت اللي بيسبق العاصفة. ولأول مرة من سبع شهور، أسمع نبرة البرود والتعالي بتختفي من صوته تماماً، وتحل مكانها لهفة الأب: ”حبيبة؟! مالها حبيبة يا سهام؟ عملت إيه وفوق سطوح إيه؟ انطقي!”
”مش هينفع في التليفون يا جلال! تعالى فوراً… البنت قاعدة لوحدها بطريقة غريبة فوق، أنا شوفت المنظر وقلقانة عليها… إلحق بنتك!”
قفلت السكة وأنا بنهج، قعدت على أقرب كرسي في الصالة، وضغطت بإيدي الاتنين على صدري عشان أهدي. عقلي كان رافض يستوعب المشهد اللي لمحته من شق الباب الخشب…
الأوضة كانت هادية وبسيطة، ومفيش فيها غير إضاءة النهار الخفيفة من الشباك الصغير… حبيبة، بنتي الهادية الرقيقة، كانت قاعدة على كرسي قديم في نص الأوضة، وحواليها ورق كتير وكراسات، وماسكة تليفونها وبترتب صور عائلية قديمة لينا ولأبوها، وبتعيط بصمت وبتمسح دمعتها، وجنبها كيس الأكل الأسود مفتوح، وبتحاول تفرز محتوياته وتتكلم بصوت واطي لوحدها وهي بتقول كلام مرتبطة بموضوع رجوعنا!
عشر دقايق بالظبط… ولقيت الباب بيخبط. جريت فتحت، لقيت جلال واقف قدامي، وشه قلقان ونفسه مقطوع كأنه طالع جري على السلالم. أول ما شافني مسكني من كتافي: ”في إيه يا سهام؟! حبيبة فين؟ جرالها إيه؟”
مسكت إيده وأنا برتعش وشاورت على السلم: ”اطلع معايا براحة من غير صوت… البنت في أوضة الكراكيب فوق، ومش طبيعية خالص يا جلال!”
طلعنا على طراطيف صوابعنا على السلم. السطوح كان هادي والدنيا بدأت تليل. قربنا من باب الأوضة المقفول… الصوت من جوة كان مسموع: شهقات وبكاء هادئ، وصوت حبيبة وهي بتقول بصوت مبحوح: ”يا رب يرجعوا… يا رب بابا يسامح ماما وميطلقهاش… يا رب أنجح وأفرحهم وميتفرقوش… أنا عملت كل جهدي عشان أجمعنا تاني وعشان نرجع زي الأول.. يا رب يرجعوا صح؟”
جلال اتصدم، وبصلي والدموع اتجمعت في عينيه كأنه أخد صدمة. مكنش قادر يمسك نفسه أكتر من كده… وبحركة سريعة زق الباب برجله بقوة فكسر القفل المصدي والباب اتفتح على مصراعيه!
حبيبة صرخت صرخة مفاجأة، واترمت لورا وهي بتغطي وشها بإيديها: ”بابا! ماما! متقربوش… أنا آسفة!”
جريت عليها وأنا بصرخ بلهفة: ”حبيبة! يا بنتي ده أنا ماما! وبابا أهو معاكي يا حبيبتي… فوقي يا ضنايا!”
جلال دخل الأوضة وهو شايف كراسات المذاكرة والكتب والورق اللي مرمي على الأرض، وتليفونها اللي مرمي جنبها. نزل جلال على ركبه جنبنا، وهو بيعيط: ”حبيبة… أنا هنا يا بنتي… أنا أبوكي يا حبيبتي، مفيش حاجة تستاهل تعذبي نفسك كده ولا تقعدي لوحدك في المكان ده!”
