زوجي

إتجوزت عزت وسكنا في شقة في نفس البيت مع حماتي وسلفي.
حماتي هي اللي ربت زوجي وسلفي بعد وفاة والدهم وهما صغيرين.
لما حمايا توفى كانت حماتي لسه في عز شبابها بس هي رفضت الجواز، وهبت حياتها لأولادها ربتهم وكبرتهم علشان كده جوزي وسلفي مش بيستحملوا الهوا على حماتي وروحهم فيها.
سلفي متجوز قبلنا بسنتين وعنده ولدين.
بعد جوازنا ربنا رزقنا بأحمد وبعد أحمد زينب.
وبالرغم من إني كنت ساكنة مع أهل جوزي في نفس البيت، إلا ان علاقتي بيهم كانت كويسة لأننا ما كناش بنختلط ببعض كتير. حماتي كانت ست بتيجي تعمل لها شغل البيت ولو إحتاجت حاجة ما كانتش بتطلب مني أنا أو من سلفتي.
بصراحة كانت بتطلب من أولادها يعني كل واحد في حاله.
بعد 3 سنين من جوازنا نقلنا في شقة تانية أقرب لشغل جوزي.
بعد ما نقلنا جوزي كان على طول بيتصل بوالدته يتطمن عليها، وكان بياخدني أنا والولاد نروحلها مرة كل أسبوع في يوم إجازته.
ولو في يوم كنت تعبانة أو مش فاضية إني أروح معاه كنت بقوله يروح هو، بس ما كانش بيراضي ويقولي يعني حتى يوم الإجازة هقضيه بعيد عنكم.
كنت أقوله إحنا راضيين روح أنت إتطمن على مامتك وإرجع.
كان يرد ويقولي خلاص هتصل أطمن عليها ونبقي نروح كلنا في يوم تاني رجلي على رجلكم.
كانت حياتنا مثالية وجميلة لحد ما فجأة من سنة توفى سلفي في حادثة وهو في عز شبابه وساب مراته وطفلين عندهم 6 سنين و4 سنين.
وفتحت وفاته صدمة كبيرة لجوزي وحماتي.
وبعد فترة من وفاة سلفي بدأت ألاحظ حاجات غريبة على جوزي.
بعد وفاة سلفي بشهور بدات الاحظ حاجات غريبه على جوزي ماكنتش بتحصل قبل كده.
واحدة بواحدة بدأت زياراته تزيد جدا لحماتي. قلت عادي ممكن عاوز يعوض غياب اخوه بس اللي مش عادي ان بعد ماكان مابيروحش الا بينا بقى يتحجج باى حجه علشان مانروحش معاه.
مثلا بقى يطلع من الشغل على هناك على طول ويتصل بيا ويقولي ان هو عند والدته ويتصل بيا ويقولي اتغدوا انتوا لاني هتغدى عند والدتي. وحتى يوم إجازته وهو رايح مبقاش ياخدني معاه ويتحجج ان العيال هتتعب من الطريق.
اشمعنى دلوقتي العيال هتتعب مالعيال كانوا اصغر من كده وبيروحوا عادي!
لا وكذا مره يتصل بيا من هناك ويتاخر ويقولي الوقت أتأخر فهبات.
وفي مره يوم إجازته جهزت لبسي ولبس الولاد وسيبته في غرفة الاطفال وبعد مافطرنا دخل لبس علشان يروح عند مامته ودخلت انا كمان لبست ولبست الولاد.
وخرج شافنا واحنا لابسين وبان عليه التوتر.
قلتله هروح معاك عند ماما وحشتني بقالي كتير مشفتهاش وبالمره تاخدني معاك عند حماتي وانت رايح نشوفها وتشوف العيال.
بان عليه الضيق وقالي ماتخليها المره الجايه وقالي ان هو رايح وراجع على طول.
قلتله احنا لبسنا خلاص لسه هنقلع يلا هنسبقك على العربيه وسبناه ونزلنا وهو نزل ورانا على طول.
واحنا في الطريق قالي هرن على والدتي واقولها أنكم جايين معايا قلتله لا خليها مفاجأه احسن وهتفرح اوي لما تلاقي الولاد داخلين عليها.
ولما دخلنا روحت سلمت على حماتي والولاد راحوا سلموا عليها وعلى ولاد عمهم.
سلفتي بقى كانت خارجه من مطبخ حماتي وكانت على سنجة عشرة لابسه ومتشيكه وحاطه ميكب ولا كأنها واحده جوزها مات من 8 شهور وأول ماشافتني اضايقت.
سلمنا على بعض نظرات سلفتي لجوزي كانت باينة اوي.
وطول القعده وكل كلامها كان موجه لجوزي بمنتهى الدلع.
وجوزي كان بيحاول يتجنبها علشان مااخدش بالي.
بعد ماروحنا قولتله انا عاوزه ارجع شقتنا علشان تفضل جنب مامتك على طول. اول ما قلت كده اتخض وقالي وشغلي وكده. قلتله ما احنا كنا فيها وكنت بتروح شغلك عادي.
وبعدين لو رجعنا الشقه هتوفر المشاوير مرواحك لمامتك وهتبقى جنبها.
بس هو رفض ورفضه ده أكد ليا ان في حاجه مش طبيعيه.
وبعد عشره ايام اتصل بيا جوزي وقالي ان هو رايح عند حماتي بس انا سمعت صوت ابن سلفي في التليفون.
سألته قولتله انت روحت ولا لسه هتروح قالي انا لسه هروح.
وقالي ممكن ابات قولتله وماله.
ومن غير تفكير لبست ولبست العيال وروحت عند حماتي واول ماحماتي شافتني اتبرجلت دخلت وسلمت عليها وقولتلها فين عزت قال ان هو جايلك قالتلي فوق عند سلفتك.
بعد ماحماتي قالتلي ان جوزي فوق عند سلفتي قولتلها طيب اطلع انادي عليه وبالمرة اسلم على دلال سلفتي.
قالتلي تلاقيه هينزل دلوقتي دي سلفتك نادت له مش عارفه هيعملها ايه في الشقه خليكي وانا هطلع انادي عليه انا.
قولتلها خلي الولاد معاكي ومع أولاد عمهم وانا هطلع انا سيبتها وطلعت من غير ماتتكلم تاني.
خبطت على الباب والباب فتح لا قيته خارج بالفنله الحمالات وبنطلون ترينج وهي لمحتها لابسه عباية خفيفه من غير حاجه على شعرها اول ماشفت المنظر من سكات نزلت عند حماتي علشان اخد ولادي.
وهو نزل ورايا جري وقالي متفهميش غلط مفيش حاجه.
حماتي اول ما شفته قالتله مش دلال كانت عاوزاك تصلح حاجه في شقتها.
قالي كنت بشوف السخان مش راضي يشتغل ليه.
قولتله تشوف السخان وانت لابس فانله حمالات؟!
واخدت ولادي ونزلت وهو نزل ورايا يقولي هفهمك كل حاجه.
سيبته وهو بيتكلم وركبت التاكسي وروحت على بيت بابا وانا منهارة وحكيت ليهم كل حاجه.
وعدى اسبوع بالرغم ان هو جيه اول مره بابا هزاه جامد بس كان بيجي وكنت برفض اقابله بس كنت بطلعله الولاد يقعد معاهم شويه ويمشي.
وبعد الاسبوع وافقت اني اخرج اقابله.
اول ما شفته قولتله هو ايه اللي بينك وبين مرات اخوك ازاي والدتك تسمح بكده وبداري عليكم اعمل حسابك انك لو كدبت هتبقى النهايه بيني وبينك.
فقال: دي مراتي على سنة الله ورسوله.
اول ما سمعته بيقول كده قولته ازاي وامتى وليه؟ انا قصرت معاك في ايه قولي!
طبعا انا كنت منهارة ازاي يعمل معايا كده.
قالي انا مكنتش موافقتش بس والدتك ضغطت عليا لأنها كانت عيانه الفتره اللي فاتت جدا وخفت تروح مني زي اخويا وبالذات ان دلال قالت إنها مش هتقعد انها هتتجوز فمكنش قدامي غير اني اوافق.
امي كان همها ان ولاد اخويا محدش غريب يربيهم.
قلتله أنتم صح مش معقول حد غريب يربي ولاد اخوك انت أولى بتربيتهم بس ولادي بقى انا جبلهم راجل غريب يربيهم لان ابوهم بيربي ولاد اخوه، طلقني!
قالي انا عمري مااقدر استغنى عنك ولا عن ولادي ولولا ان امي ضغطت عليا عمري ماكنت وافقت بلاش تهدمي حياتنا.
انا تعبت من غيركم اليومين اللي فاتوا دول ومستعد اعمل اي حاجه علشان تسامحيني.
قولتله لولا اننا عندنا أولاد كنت اصريت على الطلاق بس علشان خاطر ولادي هديك فرصة تانيه وهقولك انك تختار ولادك ولا تختارها هي وده آخر كلام عندي.
ومن غير تفكير وافق وبعد اسبوع جوزي جاب ورقة طلاق سلفتي وروحت البيت انا والاولاد معاه.
وبالرغم ان حماتي مكنتش موافقه وقاطعت جوزي فتره بس رجع وصالحها. وسلفتي لما عرفت ان جوزي طلقها رجعت على بيت اهلها وسابت بيت حماتي وطبعا هددت حماتي انها هتتجوز وعمرها ماتخلي العيال يشوفوها تاني.
بس هي رجعت تاني بيت حماتي علشان المصاريف لان جوزي هو اللي كان متكفل بمصاريفهم. اما جوزي بصراحه فكان بيحاول يراضيني على ماقد مايقدر ويعوضني على اللي عمله. واحدة بواحدة رجعنا زي الاول ومبقاش يروح لحماتي لوحده.