صاحب محل الدهب أول ما شاف الغويشة اللي في إيدي، وشي جاب ألوان وهو بيمسك التليفون ويطلب…
يوم ما ستي رحلت، كان يوم شتا.. كنت وقتها عيلة عندها 8 سنين.
آخر أيامها في المستشفى، كان عمي الكبير ومراته مابيفارقوش الأوضة.. مش عشان خاطرها، لا، دول كانوا بيقلبوا في حاجتها وهي لسه بتصارع المرض.
مرات عمي، نبوية، سحبت عمي في الطرقة وقالتله بصوت واطي ومسموع في نفس الوقت:
— بقولك إيه، فين دفتر التوفير؟ وفين عقود الأرض؟ لازم نخلص الموضوع ده قبل ما إخواتك يوصلوا ويقسموا الغنيمة.
عمي رد ببرود:
— اصبري يا ولية لما الست تخلص…
— تصبر مين يا راجل أنت! لو الموضوع هيفلت مننا، وأنت عارف مرات أخوك الصغير دي لسانها أطول منها…
أنا كنت قاعدة في ركن الأوضة، سامعة كل كلمة.. وستي كمان كانت سامعة.
مانطقتش، بس مدت إيدها الضعيفة اللي كانت عبارة عن جلد على عضم ناحيتي.
— يا نونة.. تعالي يا حبيبتي.
— أيوه يا تيتا.
مدت إيدها تحت المخدة وطلعت لفة قماش قديمة ومكرمشة، لونها بهتان من الزمن، وحطتها في إيدي.
— دي ليكي يا قلب تيتا.. وإياكي في يوم تفرطي فيها.
فتحت اللفة، لقيت غويشة غامقة، مطفية ومفيهاش لمعة، وعليها نقوش سودة خفيفة.
ماكنتش أعرف هي تسوى كام، بس كنت عارفة إنها غالية عشان من ريحة ستي.
قولت لها: حاضر يا تيتا، مش هسيبها أبداً.
بعد تلات أيام، ستي ودعت الدنيا.
عمي ومراته عملوا نفسهم أصحاب العزا، ونبوية وقفت في وسط الصوان ومعاها ورقة قالت إنها وصية الست:
سماح بنت عمي لها السلسلة الدهب والغويشة اللي كانت لابساها الست.
هاني ابن عمي له الخاتم الدهب ومبلغ كذا تحت الحساب.
نبوية كانت بتقرأ والابتسامة مش سايعاها. سماح خدت السلسلة فوراً وهي بتبص لي بمنتهى التعالي:
— يا عيني يا تيتا.. دهب صافي والله، تقيلة قوي في إيدي.
وجه الدور عليا.. نبوية بصت لي وقالت:
— أما نونة.. فستي سابت لها الغويشة القديمة دي.
بعد ما خلصت، ضحكت بجد مش بهزار، ضحكة فيها سخرية واضحة:
— يا حبيبتي يا نونة، هو ستك كانت بتكرهك لدرجة إنها تديكي حتة النحاس دي؟
الكل ضحك.. عمي ضحك، ومراته ضحكت، وحتى سماح قعدت تتريق:
— إيه يا بت دي؟ دي حديد مصدي ولا نحاس من بتاع العتبة؟
بصيت لبابا.. كان موطي راسه وما نطقش بكلمة واحدة.
كنت عيلة عندها 8 سنين، مش فاهمة التريقة قوي، بس فاهمة يعني إيه حد بيكسر بخاطري.
ليلتها نمت وأنا بعيط تحت اللحاف.. مش عشان الغويشة رخيصة، بس عشان الكل أقنعني إن ستي مكنتش بتحبني.
بس أنا كنت فاكرة لمسة إيدها وهي بتقولي دي ليكي يا حبيبتي.
الغويشة دي بقت نكتة العيلة في كل مناسبة.
كل سنة في العيد، لما نتجمع، أول حاجة تعملها نبوية إنها تبص لمعصم إيدي:
— يا خبر! لسه لابساها يا نونة؟
تقولها بصوت عالي عشان الكل يسمع:
— والله أنتِ بنت أصيلة قوي، شايلة ستك في إيدك وراضية.
وسماح كانت تزيد في الكلام، وتعدل السلسلة الدهب بتاعتها قدام عيني:
— شوفي يا نونة سلسلتي، لسه ملمعاها عند الصايغ وبتبرق إزاي.. أما اللي في إيدك دي، لو غسلتيها بمسحوق هتقشر وتبان حقيقتها.
الكل يضحك.. ضحكوا عليا وأنا عندي 10 سنين، و15، وحتى لما كبرت.
سألت بابا مرة:
— هو بجد تيتا مكنتش بتحبني؟
اتنهد وقال:
— يا بنتي الست كانت كبرت وخرفت، يمكن كانت فاكراها حاجة تانية.
سألته تاني:
— طب ليه أدت سماح دهب وأنا لأ؟
مابصليش في عيني وقال:
— عشان عمك الكبير هو اللي شايل العيلة، وهي حبت تراضي ولاده.. ما تشغليش بالك، كذكرى وخلاص.
بابا عمره ما دافع عني.. كان بيخاف من عمي ومن لسان نبوية، فكان بيختار السكوت.
لما بقيت 22 سنة واتخرجت واشتغلت محاسبة في شركة على قدها، سماح اشتغلت في بنك كبير، ونبوية كانت بتمشي تذيع في المنطقة:
— سماح بنتي في البنك، تعيين رسمي ومستقبل.. مش زي ناس شغالين في محلات.
ولما جيت أتجوز شريف، جابوا سيرتها في فرحي.
نبوية راحت لحماتي وقالت لها بضحكة صفرا:
— يا حبيبتي ما تفهميش غلط، الغويشة دي مش دهب، دي اكسسوار عادي بس البنت متعلقة بذكرى ستها.
شريف نفسه بعد الجواز قالي:
— بقولك إيه.. بلاش الغويشة دي واحنا رايحين عند أهلي.
— ليه؟
— أصل أمي بتقول شكلها غريب ورخيص.
قلبي اتوجع، بس برضه ما قلعتهاش.
المفاجأة..
من يومين، وأنا في الشغل، إيدي خبطت في المكتب والغويشة اتخربشت خربوش جامد.
خفت عليها قوي، قولت أروح لأي صايغ يشوف لي حل.
دخلت محل كبير، صاحبه راجل وقور كده اسمه الحاج رضوان.
خد الغويشة وحطها على قماشة قطيفة.. أول ما مسكها سكت تماماً.
طلع العدسة وقعد يقلب فيها يمين وشمال، وشوية وحطها تحت لمبة قوية.
— استني ثانية يا بنتي.
دخل جوه وجاب عدسة مكبرة تانية وقعد يدقق أكتر من دقيقتين.. دقيقتين صمت مريب.
رفع راسه، وكان وشه متغير تماماً، عرقان.
— يا بنتي..
— أيوة يا حاج؟
— اقعدي.. اقعدي واهدي خالص.
صوته كان فيه توتر مش طبيعي.
مسك التليفون وكلم حد: “يا دكتور ونيس.. انزل لي المحل حالاً، عايزك في أمر ضروري.”
وقفل السكة وطلب رقم تاني.
أنا كنت واقفة مرعوبة: “يا حاج في إيه؟ خضتني!”
بص لي بذهول وسألني:
— الحاجة دي جبتيها منين؟
— بتاعة ستي والله.. هي ادتهالي قبل ما تتوفى من عشرين سنة.
— ستك دي كان اسمها إيه؟ ومنين؟
ماكنتش فاهمة هو بيحقق معايا ليه.
عشر دقايق وجه راجل تاني المحل.
